Министерство за дигитална трансформација: uslugi.gov.mk и MK Safe Net
Контекст и предизвик
Министерството за дигитална трансформација на Република Северна Македонија го развива националниот портал uslugi.gov.mk, централизирана платформа за пристап до електронски услуги за граѓаните. Клучниот предизвик беше подигнување на јавната свест, зголемување на користењето на електронските услуги и градење доверба во дигиталните алатки на државата, паралелно со едукација за дигитална безбедност.
Нашата улога
ALL Media беше ангажирана како целосен маркетинг и комуникациски партнер на Министерството, задолжена за развој на бренд идентитет, стратешка комуникација, теренски активности и мултиканална промоција на порталот uslugi.gov.mk, како и за кампањата за безбеден интернет MK Safe Net, проект поддржан од Европската Унија и управуван од Министерството за дигитална трансформација.
Брендинг и визуелен идентитет
За потребите на порталот uslugi.gov.mk, ALL Media изработи целосен brand book и визуелен идентитет, со јасно дефинирани комуникациски и визуелни стандарди. Идентитетот беше применет на сите дигитални и физички материјали, обезбедувајќи препознатлив и конзистентен настап на национално ниво.
Маркетинг и комуникација
ALL Media го водеше целокупниот маркетинг и комуникација на порталот, вклучувајќи управување со социјалните мрежи, креирање информативни и едукативни содржини, развој на кампањи и координација на сите комуникациски активности. Посебен фокус беше ставен на јасна и разбирлива комуникација со граѓаните, со цел олеснето користење на електронските услуги.
Теренски промотивни активности
Организирани беа бројни промотивни настани низ повеќе градови во државата, меѓу кои Скопје, Битола, Прилеп, Охрид и други. На овие настани, граѓаните имаа можност директно да се информираат за функционалностите на порталот, додека вработени од Министерството, со логистичка и организациска поддршка од ALL Media, им отвораа кориснички профили, им помагаа при користење на услугите и им го зголемуваа нивото на безбедност на профилите.
Владина програма за вредносни ваучери
ALL Media беше маркетинг партнер и на владината програма за доделување вредносни ваучери за електронски услуги на студенти. Преку порталот uslugi.gov.mk беа подигнати и успешно реализирани над 46.000 ваучери, што претставува еден од најуспешните примери за масовно користење на електронски услуги во државата.
Продукција и медиумска кампања
За потребите на порталот и поврзаните кампањи, ALL Media реализираше повеќе видео и ТВ реклами, радио кампањи, како и изработка на промотивни материјали. Кампањата беше присутна на дигитални канали, традиционални медиуми и на терен, со цел максимален досег и информираност.
MK Safe Net – Национална кампања за безбеден интернет
Покрај порталот uslugi.gov.mk, ALL Media го реализираше и целокупниот маркетинг за кампањата MK Safe Net, национална иницијатива за дигитална безбедност, поддржана од Европската Унија и управувана од Министерството за дигитална трансформација.
Резултат
Со интегриран пристап, ALL Media придонесе кон значително зголемување на видливоста и користењето на порталот uslugi.gov.mk, подигнување на дигиталната писменост и зајакнување на довербата на граѓаните во електронските услуги.
Услуги
Брендинг и brand book, визуелен идентитет, маркетинг стратегија, управување со социјални мрежи, теренски промоции, организација на настани, видео и ТВ продукција, радио кампањи, ПР и интегрирани комуникации, институционален маркетинг.
